Er ævintýralegur þorskafli á grunnsævi, hrygningarfiskur?

Er ævintýralegur þorskafli á grunnsævi, hrygningarfiskur?

codFréttir greina frá mokafla á boltaþorski á grunnsævi. Í frétt á aflafréttir.is: segir; “Þorskurinn í þessu hali var allt 20 til 30 kílóa beljur gríðarstór fiskur.”

Á þessum árstíma má finna stórar torfur af útbelgdum hrygningarfiski á grunnsævi. Frægt er fyrir áratugum síðan, þegar stórvirk nótaveiðiskip hirtu upp ævintýralegan afla á söndunum grunnt út af suðurlandi. Aflinn varð slíkur, að stór hluti hans fór í bræðslu, þrær fylltust fljótt og þá var tekið til þess ráðs að sturta aflanum á nálæg tún, þar sem hann úldnaði meðan hann beið bræðslu. Fiskverkunin hafði hvergi undan við vinnslu.

Fyrir nokkrum árum var ég og félagi minn á smábát hér inn á Fáskrúðsfirði að dorga. Fórum vítt og breytt um fjörðinn, en urðum ekki varir við fisk. Svona áður en við færum heim með öngulinn í rassinum, hugkvæmdist okkur að þvera fjörðinn nálægt árósnum. Við settum spún á færið og keyrðum hægt, 10, 15, 20 faðmar á dýptarmælinum. Kannski gætum við húkkað í sjóbirting, var hugmyndin.

Á 15-20 föðmum, sýndi dýptarmælirinn fiskilóðningu frá kili niður á botn. Þetta fannst okkur með mestu ólíkindum. – Ákváðum að renna færi og fengum bolta fisk á hvern krók. Renndum aftur, allt við það sama. Spriklandi “30 kílóa beljur, gríðarstór fiskur” á hverjum krók. Fiskurinn var kominn þarna upp í landsteina til að hrygna. – Hvert einstakt hrogn/egg, var komið með augu og því auðséð af hverju þessi risa stóri fiskur var að þvælast uppá grynningum í Fáskrúðsfirði.

Hér á árum áður, þegar vígamóður var runninn af aflaklóm fyrir suðurlandi og fiskifræðingarnir voru búnir að hugsa málið, var komist að þeirri niðurstöðu að sandarnir væru hrygningarstöðvar þorsks. Ef ég man þetta rétt, var eftir þetta, sett bann við þorskveiðum á grunnsævi fyrir suðurlandi, sérstaklega með stórvirkum aflatækjum, og síðar var innleitt páskastopp, til að vernda hrygningu þorsks.

Niðurstaða: Þorskur leitar á grunnsævi frá enduðum mars fram í endaðan apríl til hrygningar, sbr. atferli Grásasleppu. – Það að veiða hann á þessum tíma, má líkja við að bændur færu að éta útsæðið sitt og slátra mjólkurkúnni.


Tengdar greinar

Þurfum við að borða svona mikið?

Í heimsmetabók Guinness kemur fram að hver einstaklingur setji að meðaltali ofan í sig 68 tonn af mat yfir ævina.

Alcoa Fjarðaál – Fjölbreyttur hópur

“Stefna Alcoa er að skapa starfsumhverfi þar sem lykilorðin eru: breytingar, framfarir, nýjar hugmyndir, virðing fyrir einstaklingnum og jöfn tækifæri

Skrípaleikurinn endalausi

Í allt haust hafa ótrúlegar verðhækkanir verið að koma fram. Álögur margra sveitarfélaga hafa hækkað verulega og flest sveitarfélög hafa

Engar athugasemdir

Skrifa athugasemd
Engar athugasemdir! Þú getur verið fyrst/ur til skrifa við þessa færslu!