Gjaldskrárhækkanir afturkallaðar

Gjaldskrárhækkanir afturkallaðar

Bæjarráð Fjarðabyggðar ákvað á fundi í morgun (13.1.2014), að fella úr gildi hækkun á gjaldskrám leikskóla, skóladagheimila og tónlistarskóla.

Gjöld fyrir þessa þjónustu verða þar með þau sömu og á árunum 2012 og 2013 eða þriðja árið í röð.

Að sögn Páls Björgvins Guðmundssonar, bæjarstjóra, telur sveitarfélagið mikilvægt að stuðlað sé að stöðugu verðlagi í landinu og því hafi verið ákveðið að endurskoða gjaldskrárhækkanir frá síðustu áramótum. Þá hafi bæjarráð horft til þess að hækkanir á gjaldskrám sem snúa að barnafjölskyldum yrðu dregnar til baka, í samræmi við áherslur bæjarstjórnar í fjárhagsáætlanagerð á kjörtímabilinu.

Gjaldskrár leikskóla og skóladagheimila hækkuðu um síðustu áramót um 3% og um 10% hjá tónlistarskólum Fjarðabyggðar. Með því móti átti að mæta verðlagshækkunum en umrædd gjöld hafa staðið óbreytt frá 1. janúar 2012. Nemur hækkun verðlags á tímabilinu alls 8,5%.

Ekki hefur verið gert ráð fyrir að gjaldskrár hækki fyrir skólamáltíðir eða í sundlaugar eða Skíðamiðstöðina Oddsskarði fyrir börn og unglinga. Þá var aldursviðmið í gjaldskrám sundlauga og skíðamiðstöðvar hækkað úr 16 í 18 ár, sem lækkar gjaldtöku umtalsvert í þessum aldurshópi.

Í greinargerð bæjarráðs segir að sveitarfélagið Fjarðabyggð vilji leggja sitt af mörkum til þess að verðlag haldist stöðugt í landinu og afturkalli því hækkanir á umræddum gjaldskrám. Sveitarfélagið hafi undanfarin ár stillt gjaldskrárhækkunum í hóf. Þess í stað hafi verið leitað hagræðingar í rekstri og tekjugrunnur styrktur með fjölgun atvinnutækifæra.


Tengdar greinar

Hesthúsahverfið rafvætt

Þegar þetta er skrifað er búið að rafvæða nánast allt hesthúsahverfið okkar. Rafvæðingin varð rándýr aðgerð sem vatt uppá sig

Björgunarafrek á austurlandi

Björgunarsveitirnar á austurlandi hafa verið uppteknar við að flytja fárveika sjúklinga yfir kolófærar heiðar og fjallaskörð um þessi jól. 30

Svisslenskur bakarameistari?

Svisslendingar eru snjallir í ostagerð, og eru frægir fyrir sérstaklega götótta osta sem þykja lostæti. – Nú virðist sem bakarar

Engar athugasemdir

Skrifa athugasemd
Engar athugasemdir! Þú getur verið fyrst/ur til skrifa við þessa færslu!