Saga af kappróðri

Saga af kappróðri

Nú þegar flest hross eru komin á beit og almenn rólegheit í hestamennskunni er ekki úr vegi að skoða annað sport lítillega. Þessa sögu rakst ég á á Internetinu og hafði gaman af. 🙂

Íslenskt og japanskt fyrirtæki ákváðu að keppa í róðri á áttæringi. Liðsmenn frá báðum fyrirtækjum æfðu stíft og voru í toppformi þegar að sjálfri keppninni kom. Japanirnir urðu einum kílómetra á undan íslenska liðinu.

Eftir útreiðina var mórallinn að sjálfsögðu heldur slæmur í íslenska fyrirtækinu og yfirstjórnin ákvað að fyrirtækið yrði að vinna keppnina að ári. Var settur á fót vinnuhópur til að skoða vandamálið.

Eftir heilmiklar pælingar komst vinnuhópurinn að því að Japanirnir létu átta menn róa en einn stýra. Í íslenska liðinu var það einn sem réri og átta sem stjórnuðu. Vegna þessarar miklu krísu afréð yfirstjórn íslenska fyrirtækisins að fá ráðgjafarfyrirtæki til að kanna “strúktúr” íslenska liðsins og gera nýtt skipurit ef á þyrfti að halda.

Eftir margra mánaða vinnu komust stjórnunarfræðingarnir að því að í íslenska bátnum væru það of margir sem stjórnuðu en of fáir sem réru. Með hliðsjón af skýrslu sérfræðinganna var strax ráðist í skipulagsbreytingar. Í stað þess að hafa átta stýrimenn og einn ræðara voru nú hafðir fimm stýrimenn, tveir yfirstýrimenn, einn leiðtogi stýrimanna og einn ræðari. Að auki var ræðarinn “motiveraður” samkvæmt meginreglunni: “Að breikka starfssvið starfsmanna og veita þeim meiri ábyrgð”.

Næstu keppni unnu Japanirnir með tveggja kílómetra forskoti. Íslenska fyrirtækið rak að sjálfsögðu ræðarann með tilliti til lélegrar frammistöðu, en greiddi bónus til stjórnarinnar vegna þeirrar miklu vinnu sem hún hafði innt af hendi.


Kampakátir japanir eftir frækilegan sigur


Engar athugasemdir

Skrifa athugasemd
Engar athugasemdir! Þú getur verið fyrst/ur til skrifa við þessa færslu!

Skrifa athugasemd

E-mailð þitt verður ekki birt.
Nauðsynlegir reitir eru merktir með **