Larfajakkaföt og hringibuxur – Hausttískan fyrir nokkrum árum

Larfajakkaföt og hringibuxur – Hausttískan fyrir nokkrum árum

larfatiskaVið strákarnir í fjölskyldunni skruppum á útsölur hér um árið. Farið var í verslun við Faxafen í Reykjavík og þar mátaðar buxur, úlpur og peysur fyrir veturinn. Upp um alla veggi hékk varningurinn og borðin í versluninni svignuðu undan stæðum af gallabuxum.  Dæmigerð útsala, skipulagt kaos og allt á rúi. Búðin full af skringilegum fötum og fólki sem togaðist á um varninginn. Strákurinn fann sér stagbætta skyrtu og forláta buxur með vasa fyrir neðan hnésbætur og hugðist finna sér góðan kuldajakka við dressið, bað föðurinn um að geyma jakkan sinn á meðan, treysti varlega ástandinu í versluninni.

Mátað, prúttað og greitt fyrir. Allir ánægðir og haldið af stað heim á leið. Sonurinn kominn í ný föt og hafði sett gömlu leppanna í innkaupapokann. Í Hafnarfirði var komið við í versluninni Herra Hafnarfjörður og nýjasta sendingin af jakkafötum skoðuð. Fremst í búðinni voru tískufötin. Áberandi voru svokölluð larfajakkaföt, dökk á lit með trosnuðum kragahornum og illa ásaumuðum hægri hliðarvasa úr öðru efni í ljósum lit. Við hliðina á þeim mátti líta þokkalega útlítandi föt en sá var þó galli á gjöf Njarðar að á vinstri hlið jakkans hafði verið prentaður stafurinn B í hvítu og náði hann allt frá hliðarvasa og upp á kragahornið. Léleg prentun og lítt spennandi að mati föðursins.

Verslunareigandinn sagði þetta nýja sendingu í nýrri línu og þessi jakkaföt rynnu út eins og heitar lummur. Til áréttingar vitnaði hann í tvo unga menn sem höfðu komið í síðustu viku og keypt sitt hvor fötin vegna fyrirhugaðs brúðkaups sem þeir ætluðu að vera við. – þarna var eitthvað verslað og haldið út í bíl, áliðið dags og heimferðin næst á dagsskrá. Bros á andlitum yfir furðulegri fatatísku og skrítnum smekk fólks.

wave_gotik_treffen_2007_people_49Á bílaplaninu uppgötvar sonurinn að gömlu buxurnar hans eru ekki með í farangrinum, hann hafði farið úr þeim í versluninni í Faxafeni. Í gömlu buxunum átti lyklakippan og farsíminn hans að vera og því var snúið til baka.

Á leiðinni er rætt um að buxurnar séu trúlega glataðar eins og saumanál í heystakk einhvers staðar í buxnastæðunni í versluninni. Syninum hugkvæmist að þar sem farsíminn sé í buxunum þá sé ráð að hringja í hann í þeirri von að verslunareigandinn renni á hljóðið, svari í símann áður en þær verði seldar öðrum í misgripum. Þetta er gert. -Við sjáum verslunareigandann fyrir okkur hlusta um stund á stef úr níundu sinfoníu Bethovens hljóma úr háværum hátalarasíma í buxnastæðunni og bíðum eftir að hann svari. – Ekkert svar. Hringt aftur, enginn svarar. – Við komnir á áfangastað skömmu síðar. Spyrjumst fyrir um buxurnar sem höfðu gleymst, þær hefðu átt að hringja segjum við til skýringar. – He, he, hlær verslunareigandinn og réttir okkur buxurnar. Það kom einn kúninn minn hingað að borðinu með buxurnar í fanginu og spurði hvaða verð væri á þessum nýtísku hringibuxum.


Tengdar greinar

Hundur á reynslugeldingu

“Hundur varð uppvís að því að bíta mann í fjórða skiptið á 3 árum, þar af í nóv .2012, apríl

Er forseti Alþingis að vinna vinnuna sína?

Helgi Bergmann skrifaði þann 10. maí sl. “Í dag eru 140 (hundraðogfjörutíu) dagar síðan Sigmundur Davíð Gunnlaugsson var seinast viðstaddur

Vor í Firðinum fagra

Það var auðséð á hestunum okkar að vorið var komið í fjörðinn. Þeir réðu sér vart vegna kæti þegar við

Engar athugasemdir

Skrifa athugasemd
Engar athugasemdir! Þú getur verið fyrst/ur til skrifa við þessa færslu!

Skrifa athugasemd

This site uses Akismet to reduce spam. Learn how your comment data is processed.