Náttúrupassi – Enn ein skattheimtan

Senn líður að framlagningu frumvarps um náttúrupassa. Passi þessi gerir ráð fyrir að þeir sem vilja njóta íslenskrar náttúru frá þar til gerðum útsýnispöllum greiði fyrir það, eða verði annars sektaðir um 15.000 krónur.

Svo mætti halda að ríkið hafi engar tekjur af ferðamönnum, eingöngu kostnað og því þurfi almenningur á íslandi að hlaupa undir bagga með ríkinu og þeim öðrum sem hafa tekjur af greininni.

Tekjur af erlendum ferðamönnum námu 275 milljörðum, eða með öðrum orðum, tekjurnar voru 275 þúsund milljónir á árinu 2013 – Ferðaþjónustan er stærsta útflutningsgrein landsins og stefnir hraðbyr í að skila okkur langt yfir 300 milljörðum á þessu ári.

Þarf ferðamannaiðnaðurinn og ríkið virkilega aðstoð frá almenningi við að klambra upp útsýnispöllun, göngustígum og útikömrum svo hafa megi sjálfbærar tekjur af greininni?

---