Sameining sveitarfélaga í víðara samhengi

31 okt, 2014

Prenta grein Leturstærð -16+

Fljótlega eftir að lítt upplýstir aurateljarar og ameríkumenntaðir hagfræðingar komust yfir hið annars ágæta excel forrit og uppgötvuðu súlurit og kökur í öllum regnbogans litum, varð þeim ljóst að hagræða mátti tölum svo úr yrðu haldbær línurit góðum þjóðþrifamálum til stuðnings.

Stjórnsýslan og fyrirtækin höfðu lent á slæmum niðurtúr eftir langvarandi óráðsíu. Og í stað þess að segja af sér, bentu þau á að landsmenn hefðu offjárfest í flatskjám og utanlandsferðum. -Fólk varð sakbitið, það vissi upp á sig skömmina.

Eins og oft, þegar neyðin er mikil, kemur okkur eitthvað til bjargar. Á árum áður var það loðdýraeldi, fiskeldi og feitar gengisfellingar. Nú voru það excel snillingarnir sem björguðu málum.

Lausnirnar skyldu vera sparnaður og hagræðing ásamt Sameiningu sveitarfélaga.

Allar reiknistofur ríkis- og sveitarfélaga voru virkjaðar með nýjustu útgáfu af Excel, línurit og hagkökur flugu út úr prenturum og sjá, snillingarnir uppgötvuðu að fækka mætti skúringakonum, sameina skóla, færa aukinn lyfjakostnað yfir á almenning og nota stóriðju rútur fyrir almenningssamgöngur.

Ráðherrar bættu við sig aðstoðarmönnum, og áfram var reiknað. Sveitarfélögum var gert að hagræða enn frekar til að stoppa í meint göt sem orðið höfðu til á óráðsíu timanum. Fjárlaganefnd alþingis gerðist eltihrellir.

Með excelvæðingunni hófst ógeðfellt tímabil í landinu. Alls staðar var spurt hvort þetta eða hitt borgaði sig eða svaraði kostnaði. Útgerð varð skuldug og óhagkvæm á einum stað. Hana þurfti að flytja yfir í hagkvæmari einingu og sjávarþorpin stóðu uppi með glatað lífsviðurværi. Skólastarf jaðarbyggðar varð óhagkvæmt og það lagt niður að hluta, læknavaktir svöruðu ekki kostnaði og þeim fækkað, apótekið krumpaði sig saman á einn stað miðsvæðis í “Aðal byggðarlaginu”. – Bankaútibúin hurfu frá þessum sömu jaðar byggðum, þau þóttu ekki hagkvæm. Pósturinn mátti muna fífil sinn feguri, en er nú starfræktur í fjóra tíma á dag, út frá hillurekka í kaupfélaginu og hyggur á frekari landvinninga með því að fækka póstferðum í dreifbýli.

Framsækni, útsjónarsemi og frumkvæði eru gleymd hugtök og þekkjast ekki í reikningum. Í staðinn var excel mataður á vergri þjóðarframleiðslu, framleiðni og torskildum prósentuformúlum um peninga- og aurajöfnuð.