Virðing Alþingis – Orðheldni – Heiðarleiki – Drengskapur.

by Arndís / Gunnar | 30/11/2018 08:45

[1]Segja má að Alþingi sé samansett af nokkrum hópum einstaklinga sem hafa komist á þing með því að gefa kjósendum sínum fyrirheit um betri tíð og blóm í haga. – Og oftar en ekki, svikið þau fyrirheit, þar sem flokkurinn/einstaklingurinn komst ekki til þeirra valda sem að var stefnt. Flokkurinn þurfti að sættast á ófullnægjandi málamiðlanir í tveggja eða þriggja flokka samstarfs moði, þar sem flest öll loforðin lentu utan málefnasamnings, eins og hvert annað aukaatriði, en stólaskiptingin fékkst á hreint. – Vottur af hugsjónareldi, sem mátti greina í loforðaflaumi einstakra frambjóðenda í kosningabaráttunni er oftast kulnaður þegar hér er komið og eftir stendur einstaklingur sem lafir á staðnum vegna ásættanlegra launakjara.

Virðuleikinn

Utan um veru þingmanns á Alþingi er uppdiktaður virðuleiki, óskrifaðar hefðir segja að hann skal ganga um þingið í jakkafötum í hvitri skyrtu og með hálstau og skal ávarpa þingið virðulega úr ræðustól og aðra þingmenn sem hæstvirta eða háttvirta, eftir atvikum. – Allt þetta er talið nauðsynlegt svo Alþingi Íslendinga megi halda virðuleika sínum.

Ómerkingar

Og svo gerist það, að af öllum stöðum, þar sem virðuleikinn og titlatogið virðist eiga heimilisfestu, á Alþingi sjálfu, verða nokkrir þingismenn þess uppvísir af ómerkilegum götustráka-kjafthætti á veitingastað. Og það er ekki eitt. Nokkru áður fóru forsætisráðherra og fjármálaráðherra landsins með lygum og hálfsannleik gegn fátæku fólki úr ræðustól sjálfs Alþingis. – Spurning hvort sé ámælisverðara. Rugl sauðdrukkinna þingmanna á knæpu, eða lygar og hálfsannleikur æðstu ráðamanna úr ræðupúlti Alþingis. sjá hér[2] …og hér.[3]

Endnotes:
  1. [Image]: https://aust.is/wp-content/uploads/2018/10/Coat_of_Arms_of_Iceland_2.png
  2. sjá hér: https://aust.is/bjarni-benediktsson-fer-med-osannindum-gegn-fataekum-eldri-borgurum/
  3. …og hér.: https://aust.is/kjarabotum-logid-upp-a-oryrkja-og-eldri-borgara/

Source URL: https://aust.is/virding-althingis-ordheldni-heidarleiki-drengskapur/